Оригинальный текст и комментарии

Физиолог

Слово и сказание о зверех и птахах

Фисилогъ и о лве. Три естества имат левъ. Егда бо раждает лвица мьртво и слепо раждает, седит же и блюдет до третьего дьни. По трех же днех приидет левъ и дунет в ноздри ему и оживет. Тако и о верных языцехъ. Прежде бо крещениа мьртви суть, по крещении же просвещаються от Святаго Духа.

Второе естество лвово. Егда спит, а очи его бдита. Тако и Господь наш рече ко июдеом, якоже: «Азъ сплю, а очи мои божественыа и сердце бдита»[1].

А третье естество лвово: егда отбегает лвица, хвостом своим покрывает стопы своя. Да не может ловець осочити следа его.

Тако и ты, человече. Егда твориши милостыню, да не чюет леваа рука, что творит десница твоя. Да не возбранит дьяволъ дело помысла твоего.

О утропе. Утропъ имать два рога. Живет же близъ рекы акиана на крайны земли. Да егда ся вожедает, пьет от нея и упиваеться и бореться со землею и чешет роги своими. И есть же тамо древо нарицаемо танисъ, подобно зело винней лозе добрами ветми и густо прутиемъ и чеша прутиемъ соплетаеться в них и обретаеть его ловець и удолееть ему.

Тако и человекъ. В рогъ место далъ ему есть Бог оба Завета, Ветхаго и Новаго. Рогы противныа сили, якоже рече пророкъ Давидъ: «О тобе врагы наша избодем рогы».[2] Река акианьска есть богатъство. Танис же — сласть житейскаа. Да въплетаяся человекъ не брежет о вере, но обретъ и дьяволъ и удолеет ему.

О слоне. Слонъ живетъ на горах. Слоница обрящет былие, нарицаемое мандрагураи[3] и взимает от нея. Тако же и слонъ и гиниться с нею. И егда раждаеть, взаиит в реку до вымене и раждаеть в воде. Спить же при древе. Да егда падется от него, вопиеть и приидет слонъ великъ и не может возвести его и пакы друзии 12. Да ни ти. Да тогда же возопиете оба на десяте. И приидет инъ малъ и подложитъ ротъ свой и возметь и.

Сиречь первый слонъ Евга, вторый Адамъ. Былие древо преслушаниа. А еже вкуси, яко преступи. А еже «увы мне», яко съгреши. И что озеро? Рожеству рай. И что приклоннаа древеса? Оплота райскаа. И кто сикырою изпадаа? Дьяволъ. И кто сикира? Языкъ змиевъ. И еже паде, яко изгнан бысть. И кто великий слонъ? Моиси. И кто 12 слона не могше извести его[4] и кто изведе его? Христос. То бо возведе того Адама от ада[5].

О елени. Елень живеть 50 лет. И по сем ходит по странах и во дрязгах горьских пухает змии, да идеже налезет ю, облинавшюю трижды, обухает ю и пометаетъ ю. И шедъ пьеть воду. Аще ли не пьеть, то умирает. Аще испьеть, да живет другую 50 лет. Да сего деля рече пророкъ, якоже желает елень на источьники водныя.[6]

Тако и ты, человече, три обновлениа имаши в собе: крещение, покоание и неистление. Да егда согрешиши, теци ко церкви и ко источнику живу книжну и на сказание пророческое и пий воды живы, сиречь святое комкание.

О орле. Орелъ живет лет сто. И ростеть конець носа его. И ослепнете очи его. Да не видит и не может ловити. Да возлетит на высоту, свержет себе на камень и уломиться конецъ носа его и куплеться во злате езере. И сядет прямо солнцю. Да егда ся согреет, спадут чешюи с него и пакы птенець будет.

Тако и ты, человече, егда много согрешиши, взыди на высоту, сиречь в веру и плачися предложение греха и измыйся слезами своими. Согрейся въ церкви и сверзи с себе грехи.

О финиксе. Финиксъ красна птаха есть паче всех и павы красней. Пава бо ни златом, ни сребром образъ имета, а финиксъ уакинфовъ[7] и камениа многоценна. Венець носит на главе и сапогы на ногу, якоже царь. Есть же близъ Индея, близъ Солнечна града.[8] Лежить же лет 500 на кедрех ливаньских безъ брашна. Питаеть же ся от Святаго Духа. И по пяти сотъ лет исполняеть крыле свои от добрых вонь. И клепает ереи Солнечнаго града и идет птаха та ко иерееви и входит во церковь. И сядет на степени олтарном[9] иерей со птахою. И будет все попелъ. И заутра прииде ерей и обрящет птицю птенець младъ бывшь. И по двою дньма обрящеть ю совершену, якоже и преже была. И целует ю иерей и пакы отиде на свое место.

Да како неразумнии жидове не яша веры тридневному воскресению Господа нашего Иисус Христа. Яко сию птицу самъ оживляеть, да какъ самъ себе не востави. Сего деля пророкъ Давидъ глаголеть: «Праведникъ яко финиксъ процвететь, яко кедръ ливаньский умножится, насаждение в дому Господни».[10]

О иряби. Ирябь много яець пологает на гнезде своем. Любива же и чадом своим. Да идет на чюжда гнезда и крадет яйца ихъ. Да ся умножать чада ея.

Тако и ты, человече, елико богатьство сбираеши не имаши сыти, но еси на все несытъ.

О горлици. Горлица мужелюбица птах есть. Да аще бо погибнет единъ ею, отходит другаа в пустыню и сядет на усохле древе, плачющись подруга своего. И к тому не спряжеться сь имъ николиже.

Тако и ты, человече, отлучился еси жены своея к тому не приле-пися к ней.

О неясыти. Неясытъ чадолюбива птах есть. Проклеваеть бо жена ребра птенцем своимъ. А онъ приходит от кормли своей. Проклюет ребра своя, да исходящи кровь оживляет птенца.

Тако и Господь наш, от жидовъ копием ребра его прободоша. Изыиде кровь и вода. И оживи вселеную, сиречь умершаа.

Сего деля и рече пророкъ яко уподобихся неясыти пустынней.[11]

О ластовици. Ластовица в пустыни гнездо имат на распутии. Егда же ослепнет едино от птенець ея, идет в пустыню и принесет былие и положит на очию его. И прозрит.

Тако и ты. человече, егда съгрешиши, иди к молитве и приими покоание и единосущныя ради Троица избавишися греха того.

О вдоде. Овдод творит гнездо свое и воспитает птенца своя. И посемъ облинают сами и будут нази. Да исходит единъ от птенець их и приносит пищу родителемъ своим, дондеже опернатеють и возлетита оба.

Тако и ты, человече. Егда ся состарееши, не отчай себе, но шед к церкви помолися и обрящеши милость.

О дятле. Дятелъ пестра птица есть, живет же в горах и ходит на кедры и клюет носом своим. Да где налезеть мякко древо, ту творит гнездо свое.

Тако и дьяволъ бореться со человекы. Да в нем же налезет слабость и небрежение молитвы, внидет в онь и вогнездяться. В нем же ли обрящет бодрость; бежит от него.

О лисици. Лисица егда будет голодна, идеть на место солнечно и ляжет на присолньи и держит душю свою надметься. Видевше же ее птици, мняще мьртву, приидут да едят. Да егда ся приближат к ней воскочивши и имет от них и есть. И тако ся кормит[12].

О жене и о мужи. Есть жена на западе, а мужь на востоце. Да совокупляетася оба. И изьес мужа своего жена главу и зачнет и родит двое. Да яко же родит, ту изьедят своя чада. И абие умрет. И отидет мужь на востокъ, а жена на западъ.

Тако и ты, человече, егда ти найдет житейскаа напасть, теци въ церковь и прослезися и возопи. И отступить от тебе неприазнъ.

О Горгони. Въргони[13] обличие имат жены красны и блудница. Владь же главы своеа суть змиа. А видение ея смерть. Играет же и смееться во время свое. Живет же в горах западных. Да егда приидут днье ея, да ся гонит. Станеть и начнет звать. Наченши от лва и прочаа звери, от человека до скотины и птиць и змиа, глаголющи: «Идете ко мне». Да елико их услышат глас ее, идуть к ней. И видевше ю, измирают.

Тако бо разумеет всякъ языкъ всем зверем, которым же образомъ уловляеть ю волхвъ, разумеет хитростию своею от звездъ день, в ня же ся гонит. И поидеть на место ея, волхвуя отдалеча. Она же начнет звати, наченши от лва и прочая звери.

Егда же доидет языка волхвова, отзовется ей, глаголя: «Ископай яму на месте и вложи в ню главу свою, да ее не вижу и умру. И прииду и лягу с тобою». И сотворит тако.

Тогда шедше волховъ посечеть ю за ся зря и не видить главы ея, да не умреть. И вложит ю во сосудину. Да егда узрит змиа или человекъ или зверь, кажеть имъ главу Горгонину и абие оцепенеють и Александръ[14] бо имяше ю и одоляше языком всем. И ты, человече, имей смыслъ ко Господу и удобь одолееши противным силамъ.

О змии. Змиа егда поидет пити води, ядъ свой въ гнезде своем оставляет. Да не последи пьющиа уморит.

И ты, человече, егда идеши во церковъ святую, всяку злобу остави домаси.

И пакы, егда состареет змиа и не видит, шедши влезеть в камену расселину узку и поститься днии 40 и смирит себе и излинет и пакы млада будет.

И ты, человече, постился еси 40 день, да совлачися от льсти дьяволя и облечися в новый, обновляющийся во Христа.

И пакы, егда узрит человека змиа, бежить от него. Аще ли не узрит его совлечена, пришедши бореться с ним. Аще ли есть оболоченъ верою, бежит от него.

Сего ради Господь рече: «Бывайте умни, яко змиа и цели яко голуби».[15]

О голуби. Голубъ славно есть во птицах. Разумей же о белей и о черней голубици, како ходят белыи и пестрыа и черныа и чермьныя и кормят птенци свои во сыне голубичи. Да не могут о собе возлетати, дондеже обыйдет чермнаа голубица и подаст имъ пищу не возлетять.

Тако и Спасово пришествие реша пророци, Моиси и Аронъ, Самуилъ, Данилъ, Малахиа, Исайя, Иеремиа и прочии пророци о Иисусе. И не могоша уреснити своего слова, дондеже прииде черьмнаа голубица, Иоан Креститель, то бо крести Иисуса, глаголя: «Се агнець Божий, воземляй грехы всего мира»[16]. И ты, человече, не вдаляй себе от церкви; да не вуслышиши: «Не веде васъ».

О ехидне. Ехидна есть, от полу и выше имать образъ человечь. А полъ ея и ниже имат образ коркодилъ. Ходита же и мужь и жена оба накупь, Да егда ся разгорит жена и хощется гонити, идеть к мужеви, изьесть лоно его. И зачнет и абие умрет муж ея. Да егда приближать родит жена, изьедят чрева ея чада своя. И умрет и та. И потом изыидут отцюубийци и материубийци, якоже и жидове отцуубийци и материубийци.

Убиша отца, сиречь Христа, убиша матерь, сиречь церковь. Сего ради Иоан поноси ими, глаголя: «Чада ехиднова, кто показа вам бежати от грядущаго гнева?»[17]

О стерце. Стеркъ чадолюбива птица есть. Да егда мужь принесет кормлю, блюдет жена его птенца. И изменяета кождо их корьмлю. И блюдета гнездо свое.

Тако и ты, человече, ни вечеръ, ни за утра ушибайся молитвы, ни церкви. Николи же ти удолеет дьяволъ.

О утропе. Утропъ имать от пулу и до выше образ коневъ, а полъ его и до ниже образъ рыбий китовъ. Ходить же в мори и есть воевода всем рыбам. На стране же крайней земли стоить рыба злата и не приходит от места своего, да погрешится ловцем, ходя ко утропу. Да то акы воевода сый рыбам, идет на крайную землю ко златой той рыбе. Оближеть ю и того пакы облизают вси мужи рыбии. И отходят на своа места мужи прежде, а жены последи. И пометают семя мужи, а жены идучи последи, беруть й и будут чреваты. И за седми деньми раждають. Егда же ходят на крайны земли, ставят рыбари мрежа своя на пропутие рыбамъ. Понеже будут чреваты, потоле не влавляют их.

Утроп же сказаемо есть Моисий начал пророчества. Море же весь миръ, а рыбы человеци. Златаа рыба сказаеться вход правоверию. Ходят бо прежде пророци и облизаються Святаго Духа. Лижуще бо человеци от учениа пророчества, последующе берут духовную благодать. Рыбари же суть беси. Мрежа же есть пагуба и льстиваа вождеваа, иже не идоша во след утропа, сиречь Моисеова закона, но отдалишась и впадоша во мрежа рыбарь тех и погыбоша. А шедших во след пророкъ ни сеть, ни мрежа не постиже их.

О стерце и о прочих птахахъ. Стеркъ добра птица есть. Егда бо настанет весна, сберуться вси накупь со иными прочими птицами, со гусми и утками и всякъ птиць род, от Египта и Лувиа и Срацинъ[18]. И возлетять вси и приидут во Лукию на реку нарицаемую Ксанфонъ[19] и составят тамо брань со вранми и вронами, и галицами, и гиппосы, и елико плотоядець есть.

Достоить и темъ ведущим время обрестися тамо всемъ. Да неясыче воинъство и жеравино и прочих водных птиць и житоядець на единой стране рекы той исполчится по берегу. А враново и прочих всех плотоядець птиць на друзем березе рекы.

Строять же ся, бо шесть месяць соберуться на брань. Ведят бо и дьни, в ня же ся хотят бити. Да есть слышати до небеси голву и кровь текущу во брани бьюшимся птицам и отпадению перию бес числа.

Тем же и лукиане вси перины имеют на постелях своих от них. По расходу же брани той видят враны уязвлены и прочих плотоядець птиць множество такоже и стерково. И неясытиць немало и прочих птиць. Многы же от нихъ во брани той падають мьртвы.

Брань же ихъ межи собою творять, знамение являет от обоих победа всем человеком. Аще бо стерково воинъство победит, да будет гобина пшени-ца и прочих всъх семенъ. Аще ли враново победит, да будет множество овець и говядъ и инехъ четвероногъ.

Стеркови же имеють и другое естество изрядно. Егда бо ся состаре-ють родители их и не могут летаги, чада их оба полы дръжаще и под пазуха-ми преносят от места на место. Тако ся кормят. Аще ли не видети начнут, да влагають имъ кормлю во уста чада своя. Да глаголеться от них мъзда и воздание.

[1] Азъ сплю... сердце бдита.— Песн. 5, 2.

[2] О тобе... избодем рогы.— Пс. 43, 6.

[3] ... мандрагураи...— Искаженное «мандрагора» — многолетняя трава, растущая в Средиземноморье.

[4] И кто 12 слона не могше извести его...— На этот риторический вопрос в списке нет ответа. Вероятно, здесь выпал такой ответ: 12 апостолов.

[5] ... Евга... Адамъ... возведе того Адама от ада.— Ссылка на библейский сюжет о грехопадении Адама и Евы в раю и на апокрифическое сказание о выведении Христом Адама и Евы из ада.

[6] ... желает елень на источьники водныя.— Пс. 41, 2.

[7] ... уакинфовъ...— Иакинф — название драгоценного камня.

[8] ... близъ Индея, близъ Солнечна града.— Имеется в виду африканская Индия и Гелиополь в Египте.

[9] И сядет на степени олтарном...— То есть на алтарном возвышении (на солее).

[10] ... Праведникъ яко финиксъ... насаждение в дому Господни».— Ср. Пс. 91, 13—14.

[11] ... рече пророкъ яко уподобихся неясыти пустынней.— Пс. 101, 7.

[12] И тако ся кормит. — Далее в списке отсутствует толкование. Очевидно, эта часть статьи была выпущена при переписке.

[13] О Горгони. Въргони...— Статья представляет собой пересказ античного мифа о Медузе Горгоне.

[14] ... Александръ...— Александр Македонский (356—323 гг. до н. э.).

[15] «Бывайте умни... яко голуби».— Ср. Мф, 10, 16.

[16] «Се агнецъ Божий... всего мира».— Иоан. 1, 29.

[17] «Чада ехиднова... от грядущаго гнева?» — Мф. 12, 34.

[18] ... и Срацинъ...— Сарацины — арабы.

[19] ... во Лукию на реку... Ксанфонъ...— Лукия — Ликия в Малой Азии с главным городом Ксанф на реке Ксанфон.